monumenta.ch > Hrabanus Maurus > sectio 1

Word Selection for Searching

Report an Error in this Sectio
Hrabanus Maurus, Martyrologium, 11, 1
KAL. NOVEMB. In castro Divionensi natale Benigni presbyteri, qui cum Andochio compresbytero et Thyrso diacono missus est a sancto episcopo Polycarpo ab Oriente in Galliam tempore Aureliani, qui, praedicatione eius comperta, vinctum eum et caesum ad se adduci praecepit, et audita sermonum eius constantia nervis durissimis eum caedi fecit, et Terentio comiti superandum tradidit, a quo ad trochleas extensus est, et caesus, ac rursum carceri mancipatus, mane idola orando destruxit, et reductus est in carcerem, cui subulas decem calentes in manibus infixerunt, et a plumbo remisso pedes in lapide perforato fixerunt, et canes duodecim feroces cum eo incluserunt per sex dies, et attulit ei angelus panem coelestem, subulas abstulit, et eum de plumbo ac ferro eripuit. Post hoc collum eius vecte ferreo tundi et corpus lancea forari iubetur: quo facto columba nivea de carcere, Christianis aspicientibus, ad coelos ascendit, et odor suavissimus quasi paradisi secutus est: discedente Aureliano a loco, supervenit Leonilla, et conditum aromatibus corpus non longe ab ipso carcere sepelivit. Eodem die natale sancti Caesarii diaconi et Iuliani presbyteri; qui videlicet Caesarius tempore Claudii imperatoris veniens ex Africa ad Terracinam Campaniae civitatem, dum contra idololatras proclamaret in publico, tentus est a Firmino pontifice et in custodiam reclusus, ubi diebus multis maceratus deinde traditus est Leontio consulari Campaniae. Quem ille cum verbis superare nequiret, iussit vinctum ante carpentum suum ducere, ligatis manibus, nudum usque ad templum Apollinis: quo cum pervenissent, ad orationem eius corruit templum, et occidit pontificem Firminum; post haec reclusus in carcere a Luxorio primo civitatis, fuit ibi annum et mensem unum. Deinde eductus in foro, a Deo dum oraret coelesti luce circumdatus, ut ipse Leontius crederet, et Caesarium, qui erat nudus, sua chlamyde indueret, et baptizaretur, ac corpus ac sanguinem Domini acciperet de manu Iuliani presbyteri, nec mora, dicta super eum oratione, spiritum tradidit III Kal. Nov. Tunc Luxorius iussit Iulianum et Caesarium mitti in saccum et praecipitari in mare: qui eodem die reiecti sunt ad littus et sepulti ab Eusebio servo Dei, iuxta urbem Terracinam; et idem Eusebius postea martyrium passus est cum Felice presbytero. Eodem die depositio Severini monachi de Tiburtina civitate. Ipsa die memoria celebratur omnium sanctorum, quod constituit Bonifacius papa, qui delubrum vetustum, quod ab antiquis Pantheon vocabatur, concedente Focato Caesare, in honorem sanctae Mariae Virginis et omnium sanctorum dedicavit. Item in eodem die in monasterio Fulda dedicatio ecclesiae sancti Bonifacii, et translatio corporis eiusdem sancti martyris.